निफाड तालुक्यातील पिंपळगाव बसवंत येथे आगीचा तांडव; 15 ते 20 दुकाने आगीच्या भक्षस्थानी
नाशिकच्या निफाड तालुक्यातील पिंपळगाव बसवंत येथे दुपारच्या सुमारास भीषण आग लागल्याची घटना घडली आहे. घोडके नगर परिसरात असलेल्या एचडीएफसी बँक च्या पाठीमागील भागामध्ये एका रद्दीच्या दुकानालाही आग लागली होती. शेजारीच असलेल्या भेळ भत्ता बनवण्याच्या कारखान्यात देखील ही आग लागली.
या ठिकाणी असलेल्या गॅसच्या टाक्यांचा स्फोट झाल्याने रौद्ररूप धारण केले. त्यात शेजारी असलेल्या बांबूच्या व लाकडांच्या वखारीला देखील ही आग लागली. त्यामुळे आग आणखी भडकली.
आग एवढी भीषण होती की ओझर एच एल, पिंपळगाव बसवंत, निफाड येथून तीन अग्निशमन दलाचे बंब आग विझवण्याचे प्रयत्न करत होते. तीन तासांच्या अथक प्रयत्नानंतर आगीवर नियंत्रण मिळवण्यात यश आले आहे. यामुळे लाखोंचे आर्थिक नुकसान झाले असून, सुदैवाने जीवितहानी झालेली नाही. अद्यापही काही ठिकाणी ही आग भडकत असल्याने अग्निशमन दल घटनास्थळी तळ ठोकून आहे.
लोक संदेश न्यूज मीडिया प्रायव्हेट लिमिटेड मुंबई/ सांगली
