1 एप्रिलपासून नऊ लाख सरकारी वाहने भंगारात. ..........नितीन गडकरी

लोकसंदेश न्यूज नेटवर्क

1 एप्रिलपासून नऊ लाख सरकारी वाहने भंगारात.

..........नितीन गडकरी

दिनांक : 30-Jan-2023

नवी दिल्ली,

केंद्र तसेच राज्यांच्या अखत्यारितील 15 वर्षे उलटून गेलेली सुमारे नऊ लाख वाहने तसेच बसेस येत्या 1 एप्रिलपासून रस्त्यांवर धावणार नाहीत, अशी माहिती केंद्रीय भूपृष्ठ वाहतूक़ व महामार्ग मंत्री नितीन गडकरी यांनी आज सोमवारी फिक्की संघटनेच्या कार्यक्रमात दिली.

केंद्र व राज्यांच्या अखत्यारितील 15 वर्षांपेक्षा जुनी वाहने हद्दपार करण्याचा निर्णय काही महिन्यांपूर्वी केंद्र सरकारने घेतला होता. त्यानुसार अशी जवळपास नऊ लाख वाहने 1 एप्रिलपासून हद्दपार होणार असल्याचे गडकरी यांनी नमूद केले. राज्यांच्या अखत्यारितील वाहनांसोबतच राज्य परिवहन मंडळ आणि सार्वजनिक कंपन्यांच्या मालकीच्या 15 वर्षांपेक्षा जुनी वाहने हद्दपार होणार असल्याचे गडकरी यांनी सांगितले.

इथेनॉल, मिथेनॉल, जैव सीएनजी, जैव एलएनजी तसेच इलेक्ट्रिक वाहनांना प्रोत्साहन देण्याचे सरकारचे धोरण असल्याचे सांगून गडकरी म्हणाले की, सरकारच्या अखत्यारितील गाड्या हद्दपार केल्यानंतर त्यांची जागा ज्या नव्या गाड्या घेतील, त्या पर्यायी इंधनावर धावणार्‍या असतील. सौर ऊर्जा देशात मुबलक प्रमाणात उपलब्ध आहे. अशा स्थितीत इलेक्ट्रिक वाहनांत सौर ऊर्जेचा मोठ्या प्रमाणात वापर होऊ शकतो. लांब पल्ल्यासाठी धावणार्‍या ट्रकसाठी एलएनजी हा एक चांगला पर्याय ठरू शकतो.